1867 bilsirangonin Garo Hills a∙jao toromni gita dingtang dingtang daka rikani aro kamrangko nikna man∙baenga, Tura Diocese ni chu·sokanian bilsi 50 na dangdike on·baani sakkiko mesoka. A∙chik jatrangko dingtangmancha catholic ona rimbana gita 1933 bilsioni aganprake kam ka∙na a∙bachengaha jekon ru∙uta bilsirangna skangan catholic toromko gipatna Fr. Rudolf Fontaine aro Jesuits kam ka∙samsoaha.
A∙chikrangoni skanggipa catholic toromona napolchenggipa Bangladesh biaponi ong∙aha. Ja∙mano uamang Garo Hills a∙jani Baghmara ona re∙bae songdongeskaaha. Skangni somoio catholic toromko gipatna kam ka∙anio A∙chikrangoni saksa Peter Shem Momin gisiko nangbee kamrangko ka∙angaha. Ua Shillong songjinmao game ge∙e cha∙ani bidingo skie on∙ani somoio dingtangmancha Catholic toromko ra∙chakaha. Uni rakbee kam ka∙anichi adita songrang jekai Laskarpara, Chotcholja, Damit Apal, Kharkutta aro Dilma songni manderangko Catholic toromona rimbana gita man∙aha.
1923 bilsio skanggipa Salesian missionary Fr. Gil, Garo Hills a∙jaona re∙bae toromni bidingo kam ka∙chengaha. Uni ja∙mano DonBosco Salesian oni Europe a∙songni pamongrang aro Missionary of Christ Jesus (MCJ) ni Sister saksa 1948 bilsini gisepo re∙bae toromni bidingo kam ka∙angaha. 1956 bilsio dingtangmancha India a∙songni missionary sakgni Fr. M. P Alexander aro Mathew Elanjipuram catholic toromko gipatna kam ka∙anina re∙chakatpaaha. Uni ja∙man ia namgipa kamko ka∙na bang∙a an∙tangtangko on∙kanggipa manderang ong∙katbaaha uamangoni Fr. E.O Mathew aro Fr. George Mamalassery aro George Elavumkunnel ba ia mission-o kamko ka∙pana 1960 bilsio ong∙katpaaha.
1972 bilsio Rt. Rev. Orestes Marengo SDB ko Episcopal Vicar ni biapo rakkiaha. Ia kamna rakkianio Tura Diocese ko name dake nirokna gita 1973 bilsini April 7 tariko a∙bachengataha. Ua somoirango Garo Hills aro Assamni adita bakrango sak hajal 40 mang A∙chikrangoniko catholic toromona rimbana gita man∙aha. Iano kam ka∙na a∙bachengna gita sakdok parishi, sak kolgriksa pamongrang, aro sak kolgrikdok sister rangchi kam ka∙chakatchengaha. Bishop Marengo ni dilani somoio diocese ni dal∙roroaniko namen nikna gita man∙aha. Gital parishi rangko songe on∙a aro dal∙dalgipa rika cho∙anirangko a∙bachengatna gita skang done re∙mikkanganiko dakbaaha. Diocese ko dal∙dapate bang∙a parishi, giljanok, hostel aro skulrangko kulie on∙angna gita Bishop George Mamalassery ba dakchakangaha. Bang∙a toromni dilgiparang diocese-ona tom∙bana a∙bachengbaaha. Uamangoni Mary Immaculate ni sister, Mary Help Christian ni demechikrang, Franciscan brother rang, Claretni Father rang, charity missionary rang aro bang∙a dilgiparang ong∙katbae diocese ni dal∙roroanio namen dakchakaniko on∙baaha.
Bidako jolrango gipatna kam ka∙anioba 1987 bilsio Turao catholic College ko a∙bachengate on∙a gita Bishop George DonBosco ni Salesian rangko okamataha. Unbaksana 150 palangko done Holy cross Hospital ko 1993 bilsio a∙bachengate jolni manderangna sanna bannaniko on∙na gita a∙bachengataha. 2004 bilsio diocese ni bilsi 25 ong∙aniko manie Bishop George Mamalassery ni dilaniko ra∙chakangan baksa Danakgre Rino Simonetti Nursing School ko oprakeba on∙angjolaha. Ua bilsini gisepon Rev. Andrew R. Marakko co-adjutor bishop na seokaha aro 2007 bilsio bishop ni gadangona uko seokangaha. Bishop Andrew R. Marakni dilbaanio diocese namen silrorobaaha. Gital parish rangko songna gita man∙baaha aro bang∙a toromni dilgiparang dangdike on∙a tom∙bimongbaaha. 2017 bilsio sacred heart shrine ko oprake on∙a gita man∙aha aro 2019 bilsio diocesan pastoral centre ko oprake on∙a gita man∙aha. Unbaksa 2020 bilsio auxiliary bishop na Rev. Fr. Jose Chirackal ko seokaniko dakangaha. Ia seokaniko 2020 bilsini July jao dakaniara diocese na namen mikkim rasongko ra∙baaniba ong∙aha.
Chu·sokaniko nipilataiani:
Bilsi 50 ni gisepo Tura Diocese ni dal·rorobaaniara aiao inmanani ong·a. Gitalgipa parishrang, bida nokrang, sanna bannani cholrangko ra·baani, songsalna dakchakanian uamangni chasongna manderangna bimchipe dangdike on·ani, bebe ra·ani aro chakchikaniko mesoka.
Skie ra∙ani biapo Tura DonBosco College, Loyola College Williamnagar aro gipinrang chatro chatrirangna seng∙ani bidako on∙anio mongsonggipa onga. Sanchakram biaprang jekai Holy Cross Hospital aro gipin sanna bannani biaprang songsalna dangdike on∙anio mongsonggipa ong∙a.
Tura Diocese ni songsalna dangdike on∙anio, skianio aro toromni gimin manderangna giproroatna kam ka∙aniko bang∙en nikna man∙a. Uamangni a∙bachenge on·gipa Cooperative society, Self Help Group rang songsalo neng∙nikanirangko namdapatna kam ka∙anio tom∙tomani aro dingtanganiko ra∙baaha.
Tura Diocese ni Golden Jubilee ko maniengon batanggimin salrango kam ka∙aniko nipiltaianisan ong∙aigija mikkangchi nambate songsalna dangdike on∙angkuna miksonganiba ong∙a. Tura Diocese ni chu∙sokaniara an∙tangtangko on∙kange dangdike on∙gipa missionary rang, toromo dilgiparang aro Diocese na ka∙sae dangdike on∙giparangni a∙selsa chu∙sokna amaha. Golden Jubilee ko manianio sakantinan mittelpilskaani, chu∙sokaniko maniani cholko on·angan baksana mikkangchi an∙tangtangko diocese na dangdike on∙angkuna on∙kanganian ong∙a.
