South Garo Hills aro West Garo Hills ni damgni biaprango sakgni bilsi sokugijagipa me∙chik bi∙sarangko drae til∙ekaha ine koborko man∙soaha. Ia obostarang November 1 tariko ong∙aha aro dosi dakgipa manderangko POCSO Act o pangchake pulis dolrang rim∙aha ine parakataha.
Skanggipa mamla SGH Jadigittimo ga∙aka jeon demechik saksako uni ma∙gipani segipa gital ra∙taigipa noktangon ia namgijagipa kamko ka∙aha ine u∙iataha. Me∙chikni ma∙gipa uni segipa Cheng Ch. Marak ni kosako Jadigittim pulis na badi ka∙doangaha aro POCSO Act ni ning∙o pangchake Baghmara me∙chik pulis thanao mokordomako segatangaha.
Apsan dakgipa obosta West Garo Hills Chibinang o bilsi 14 ong∙gipa me∙chik bi∙sako uni me∙a bi∙sa ripengskarang baksa nokchina re∙bapilmiting somoio denggu dakgipa manderang rim∙srukange til∙ekdraaha ine parakataha. Dosi dakgipa sakbonga manderang bi∙sarangni re∙baako nike me∙a bi∙sa sakgniko dokna satna a∙bachengaha aro me∙chik bi∙sako drae bike o gate ra∙angaha. Me∙chik bi∙sani agananio ma∙sie uamangoni saksa Zakirul Islam ko pulis dolrang Chibinang songoniko rim∙na man∙aha ine WGH ni SP Abraham T. Sangma parakataha.
Gipin dosi dakgipa manderang Chibinangoni Rakif Rahman, Bhima Sainasi, Laddu Islam aro Bhogularbita Phulbarioni Kaushik Gupta iamang ong∙a. Uamangoni sakgittamko pulis dolrang rim∙na man∙aha aro saksade kate dongenga ine parakataha.
