Tura Diocese ni bilsi 50 gapaniko maniani somoio garirang re·rurana neng·nikaniko olgrokatnagita, songjinmani adita biaprango traffic light rangko songe on·anga. Ia maniani salrango traffic pulis ni dilaniko man·e niamrangko ja·rikchina aro garirangko tarisogimin biaprango donchina didianiko on·angaha. Tarisogimin biaprangoni Don Bosco School kal·chakramko mongsonggipa sokgiparangni garirangko donchakna jakkalanggen, gipinoni watatako man·giparangna Don Bosco College ko, gipin garirangko mission compound aro Government College kal·chakram a·damo donchakatna tik ka·angaha.
Ia salrango program ong·chakramni wilwilao donggipa adita ramarangko re·na man·janagita dikdiksana dontongatenga. Iasan ong·aigija ramarangko re·na dingtangatani a·selo jajaaniko man·pajachina aro pekwatgipa ramarangko nie salpachina pulis dolrang manderangko mol·molangaha. Gari rakkina man·gijagipa biaprango donpajachina aro samtangtango dongimin chinrangko nie ja·rikchina u·iataha. Pulis departmentni sapgipa official rangko ia kamna daitoko pakwataha, uamango maiba u·ianiko sing·na nanggenchimode 8837423053 aro 9089199064 control room numberona ka·atpachina pulis department parakataha.
