Unitarian Union North Eastern India ni ong∙atgipa Babu Hajom Kissor Sing ni siani bilsi 100 gapani salko gisik ra∙e U Soso Tham Auditorium Shillongo manianiko dakangaha. Ia gisik ra·e maniani salo Khasi ku∙sik aro A∙chikkuko ripingna poraienggipa chatro chatrirangna, lekka serakgiparangna aro chappa ka∙atanirangna sorkari tangka paisani gita dakchakanggen ine skotong Minister Conrad Sangma parakangaha. Eighth Schedule o Khasi aro A·chikkuko napatna ma∙mong sorkari baksa dondikgija agangrikanirangko dakenga ineba ua agandapangaha.
Jatni dakbewal aganbewalko ripinganio see rakkianirangni gamchatgipa ong∙aniko nike sorkari a∙jao agangipa ku∙sikrangchi lekka serakgipa aro uarangni bidingo am·sandie poraienggipa chatro chatrirangna dakchakaniko on·na mangsongangaha. Una agreba jatni dakbewal rikbewalko tarienggipa jawilwatrangnaba tangka paisanigita dakchakanggen ineba Sangma aganangaha. Unbaksana Meghalaya Legislative Assembly o Garo Hillsni MLA rangna Khasi ku∙sikko aro Khasi Hills ni MLArangna A∙chik kusikko aganronggipa kattarangko skie on∙aniko dakanggen ine parakangaha.
