South West Garo Hills a·jao skanggipa changna Chess Championship 2023 ko Ampati Degree College o ong·atanggipa November 4 tariko matchongaha. SWGH District Chess Association aro District Sports Office ni bakrime ong·atgipa ia chess kal·susaaniona sak 60 na bate gisiko nanggiparang re·bae susaanganiko nikangaha. Ia susaaniko salgnina ong·atangaha jekon bak dakate general category, bilsi 10, 15 ni ning·ao ma·ekate susaataha aro ja∙del bolchagimin manderangna dingtang dake kal·atangaha.
General category o skanggipako Charming R. Marak, gnigipako Ponkas Marak aro gittamgipako Princestar R. Marak man·angaha. Bilsi 10 ni ning·ao Baiyansrang K. Sangma skanggipako, gnigipako Chingchaw Ch. Marak aro gittamgipako Sengdo M. Sangma man·angskaaha. Bilsi 15 ni ning·ao kal·atgipako Yunkeychean Marak skanggipako man·e, Chongkimbea M. Sangma gnigipa aro Salora T. Sangma gittamgipa ong·angaha.
Ja∙del bolchagimin manderangna kal·atanio Livingstone A. Sangmako chegipa ine parakangskaaha.
Ia kal∙susaanio Mahendraganj ni MLA Sanjay A. Sangma, Boldamgreni MDC Stevie R. Marak aro gipin dilgiparang bakko ra·e chegiparangna upadi lekkarangko aro trophy rangko suale on·angaha.
