Tura-Dalu ramagita re·gipa km 6 mang chel·ao donggipa Sangknigre silni dolong nosto ong·ani gimin November 8 aro 9 tariko taripiltaiani kamrangko ka·anggen ine Executive Engineer office, PWD (road) manderangna u·iatangaha.
Re·anggipa October 15 tariko bostu gate salgipa jregipa garirangni re·ruraani a·sel ia dolong nosto ong·aha. Ia ramako jakkalenggipa manderangni naljokanina garirangni re·ruraaniko dikdiksana dontongatna tik ka·angaha. Nosto ong·gipa dolongko tarimiting somoio Kerapara-Deku ramagita garirangko watskagen ine u·iataha. Ia ramako ta∙rake re·rurana man·tainagita ia donsogimin salrangni gisepo dolongko taripiltaie on·a jotton ka·anggen ine Executive Engineer office oni parakataha.
