Meghalaya Tourism ni gita skanggipa changna Krimkro Music Festival ko November 11 tariko Jengjal Baljeko attam 4:30 bajioni ong∙atna tik ka∙angaha. Ia Festival ko A∙chikrangni mongsonggipa maniani 100 Drums Wangala somoio A∙chik jatni daka rikanio jakkalgipa doka damanirangko jakkale an∙saodapatna aro ripingangna miksonge ong∙atna manchiangaha.
Ia manianio git ring∙na aro dokna damna changbegipa dingtang dingtang dolrang jekai Chegim Durama, G-Hills Finest, Da Suraka, Shammy & The Band aro Nokpante uamangni changa sapaniko jakkale ring∙mesokanggen. MOA dolni gita Chigring aro dotdrongrangko dokgrime mesokanikoba nikangna man·anggen. Una agreba Resubelpara oni Rongdiping Socio Cultural club A∙chikrangni doka damanio jakkalgipa bosturangko jakkale dokmesokanggen. Unbaksana A·chik Theatre Turani golpo agananirangko aro golporango pangchake dakmesokanirangko November 11 tariko nikangna man·gen.
Wangalani somoio jatni kattarangko aro gitrangko ring·e chegiparangba ua somoio ring·sale mesokanggen ine koborna parakataha.
