Shillong Lok Sabhani biapo susana seokaniko dakengon dolni dilgiparangni gisepo maming bak dakani dongja ine NPP ni ku·watimgipa aro Cabinet Minister Marcuise N Marak mijal salo aganangaha. Dolni ning·ao dingtang dingtang dilgiparang dongani gimin chanchianirangko aro namnikatangko talaton nangrikanirangba dongaia. Pilak dilgiparangni chanchirime jinma ra·chakaniko dakesa seokaniko dakangen ine Marak aganangaha.
Partyni committee susanasienggipani bimingko chubatgipa bil man·gipana parakatgen. Party ni high command uiatgiminrangko nigrike amna krabatgipao pangchake ja·ku de·anggen ine Marak aganangaha.
Ia talataniko Deputy Chief Minister Sniawbhalang Dhar uni grigipa Mawhati ni MLA gitcham Dasakhiat Lamare na party ticket ko on·china ine nangnikaniko mesoka ja·man Marak aganangaha. Dhar rangni janapaniko NPP dolni gipin dilgiparangni gisepo namnikgijani aro kusi ong·gijani dongenga ine koborko man·ani ja·man Marak agantalangaha.
Gipin susanagiparang jekai Mawsynram ni gitcham MLA, H.M Shangpliang donga, Dasakhiat Lamara uni nikanio namen gitalbegipa ong·a aro Umroini gitcham MLA, George B. Lyngdoh, NPP dol baksa bakrimna am·aniko name ma·sikuja ine Marak aganangaha.
Shillong LS biapna susanagipa mandeko seokujani gimin jajaanirang ong·katani dongja. Susagrikanio bakko ra·na namnikgiparang Delhi o a·dokko niksengatna sikaniko mesokaniara namgipa ong·a, indiba bon·kamao saksa kragipakosan seoke party ticketko on·gen ine Marcuise Marak agandapangaha.
