NEHU University ni Joint Action Committee (JAC), NEHUTA, NEHUNSA aro NEHUSU dolrang niamo pangchake uamangni mingsku dabianirangko NEHU Vice Chancellor knachakgija aro ja·ku de·e kamrangko ka·gija dongengani gimin ia jani 13 tarikoni dontonggija jingjengataniko dakanggen ine koborna parakataha. Ia ja·kuko de·na miksonganiko mijal salni bako JAC rangni tom·anio jinma ra·chake tik ka·angaha.
Uamangni mingsku dabianirangara technical officer ko kamna niamgri rimnapgiminko bakan ra·galchina, Statutory officer rang aro University Engineer rangko ko rimnapchina, University o nosto ong·angenggipa sanna bannaniko dakgipa biaprangko taridapchina, skigiparangni kamrangko olgrokatchina, NEHU ni niam retiko gital dake parakataichina, NEHU ni official website o niamrangko nambate u·iatna, convocation programko bilsianti ong·atna, porikkao mark rangko on·anirangko namdapatna, NEHUSU ni seokgimin member rangko Academic Council o bak ong·atchina aro poraia skiani gadango ja·manchakgipa biaprangna a·kanggiminrangko block aro songnigita nipiltaichina janapanggiminrang ong·a.
Ia janapgimin dabiarango pangchake bakrimgimin NEHU University ni dilgiparang VC ni kosako chotchanggija jingjengataniko dakangna ja·kuko de·e tik ka·aha.
