A·dokni gital NPP President aro Deputy Chief Minister Prestone Tynsong, office o kam ka·nagipa Executive Committee rangni adita bimingrangko segate ra·chakaniko dakchinagita NPP National Chief, Conrad K. Sangma na chittiko on·angaha. Ia seokgimin bimingrangko partyo dilgiparangni dingtangani aro sakantikon rimnapna miksonganio pangchake dakangaha ine Tynsong parakataha. A·dokni Executive Committee na manderangko seokengon partyni niamrangko rakkina neng·nikanikoba ua agane janapgimin bimingrangko ra·chakchina Chief Minister ko Tynsong mol·molataha.
Chittio janapatagita Working President na sakgittam dilgiparangko chong·motan Cabinet Minister Marcuise N. Marak, Jowai ni MLA Wailadmiki Shylla, gitcham Mylliem MLA Hamletson Dohling ko seokangaha. Apsandaken Vice President na sakgittam dilgiparangko seokaha, uamangoni Deputy Speaker Timothy D. Shira, Cabinet Minister Comingone Ymbon aro Jirang MLA Sosthenes Sohtun ong·a. Unbaksa sak dok General Secretary rangko aro sak 21 Secretary rangni bimungrangkoba janape mol·molaniko dakangaha.
Una agreba pilak MLA rang, Chairman, Deputy Chairman, CEM, Deputy CEM rang, a·dokni me·chik dolrangni President aro Chadamberangni President rangko executive member rangna seokaha. Babeth K. Sangma aro Nihim D. Shira ko Party ni Advisor na songaha ine parakataha. Mawsynram ni gitcham MLA, H. M Shangpliang ko partyni ku·watimgipa dake seokangskaaha.
