North Garo Hills a∙jao Gokgolgre songoni Achotchong songona PMGSY rama tarianiko MEEHEN Infratech company ru∙uta bilsirangonin matchotgija galchipe donenga ine Niksamso Garo Community Organization (NGCO) dolrang koborna parakataha. Ia kamko 2021 bilsini gisepon matchotatna nanga ga∙akgenchimoba da∙ona kingkingba galchipe donengkua ine uamang u∙iatangaha. Ramako taria matchotgijaniko songni manderang jegale changni chang janapaniko man∙ani ja∙mano adita salrangna kamrangko a∙bachengataie tangkarangko oke jakkale kamko matchotatgija dontongpilaia ine songni manderang u·iatangaha.
Iasan ong∙aigija ia company chiringrangoniko an∙cheng aro chonchongipa ro∙ongrangko niam gri bikote chiring chibisikrangko nosto ka∙enga ine parakataha. Ia company Garo Hills ni bang∙a biaprangon kamrangko jako ra∙e tik ong·e ka·gija matchotgija galchipe donaniko nikronga ine NGCO dolrang parakataha. Indake kam chu∙soke ka∙na amgijagipa dolrangna kamrangko jako ra∙e ka∙na sorkarinigita on∙a nangja ine uamang raken jegale aganangaha.