North Garo Hills Bolsonggre ni ning·o ong·gipa Ani Aga songo donggipa Animal Husbandry & Veterinary department ni nokko Bajengdoba Unit ni A·chik Holistic Awakening Movement (AHAM) dolrang re·anggipa Budbar salo nieaniko dakangaha. Uamangni nieani somoio ua biapni obostako mikrontangchi nikenagita man·an baksana songni Sordar aro Secretary baksaba golpogrikanirangko dake uamangni neng·nike janapgimin obostarangko see rakkirikaha ine AHAM dol u·iatangaha.
Songni manderangni agananigitade Bolsonggre Veterinary quarter o chi aro bijoliko chu·ongagita man·jaengani a·selo uno kam ka·enggiparangna salantini kamrangko ka·nagita neng·nikanikosan on·aigija jile kae donenggipa matburingrangko simsakanioba neng·nikaniko man·enga ine janapangaha.
Uandake kam ka·enggiparang an·tangtangni kamrangko mikkangchi name ka·angna man·agita aro jilenggipa matburingrangko an·seng baljoke rakkina aro name nirok simsakna man·agita Veterinary department ko daito ra·e dilenggiparangko ta·raken kamrangko nirokatchina didiangaha. Ia Bolsonggre AH & Veterinary department o song dam 200 mangna batpile pangchakgiparang donga ine AHAM dol janape mol·molangaha.
