Public Works Department (PWD) ni kam ka·anirangko namdapatna a·dok sorkari Planning, Finance aro PWD dol gittam department rang baksa bakrime tom·e Office Memorandam (OM) ko tarina chanchiangaha ine koborna parakataha. Ia tom·anio dol gittam departmentrang PWD ni gital rama jal∙angrangko tarian baksana gitcham ramarangko namdapatna aro nirok simsake kam ka·ani bidingo chanchirimingaha ine Deputy Chief Minister Prestone Tynsong parakangaha.
Tynsong ni aganani gitade National Highway ko changija Meghalaya a·doko komibeoba 10,000 km mangni rama jal·angrang donga aro ia rama jal·angrang ko nirokanio, namdapatanio nambate kam ka∙na man∙agita ta·raken OM ko tarigen ine u·iatangaha. Unbaksana badia rama salantio re·ruraanio nangchomotgipa, mongsonggipa ramarang aro songrangona re·gipa ramarangko ma∙eke taridapna nanganirangkoba ia tom∙anio chanchirimangaha ine Tynsong parakataha.
