Da·al salni bako South West Garo Hills a·jao Children’s Day ko gisik ra·e Ampati Multi Facility Centre o nambee maniangaha. Ia manianiko “For every child every right” katta bichongo pangchake District Administration baksa ICDS aro MSRLS bakrime ong·atangaha. Ia manianiko ong·atani somoio adita dingtang dingtang kal·susaanirangko, golpo agananiko aro an·tangtangni changa sapanirangko mesoksusaaniko ong·atangaha. Ia kal·susaanirangko ong·atani miksonganiara tom·aniko an·saoatna aro bi·sarangko chimongate skie ra·ani cholko on·agita ong·a.
A·jani ADC RZ D. Shira mongsonggipa sokgipa ong·e skul re·na chol ong·gijagipa bi·sarangnaba katchaaniko man·agita ia salni gamchatani bidingo aganangaha. Unbaksana dal·drobaenggipa bi·sarangna be·enna namgni ong·gipa cha·a ringaniko nangaiasan ong·aigija gisiknigitaba an·seng baljoke dongani bidingo Shira agantalatangaha. Mikkangchi sakanti bi·sarangko namgipa bewalo dal·atna aro chu·gimik namroro silroroatna nangani bidingoba ua aganangaha.
Ia tom·anio DSWO Z R. Marak, CDPO T K. Marak, DSEO Zikzak T. Marak aro adita Anganwadi o kam ka·giparang dongpae bakko ra·angaha. A·jani dingtang dingtang skulrangoni re·bae bakko ra·anian songsalo bi·sarangni namgnina bimchipe kam ka·aniko mesokani ong·a. Ia bi·sarangni salko gisik ra·e a·jao manianiara katchaanikosan ra·baaigija bi·sarangni dal·droanio chu·gimik namroro silroroanina jakko on·anian ong·a.
