West Garo Hills a∙jani Pukan Memorial College, Dalu o dingtang dingtang kamrangko ka∙na siknapatani, sima ari aro songsalni ong∙enggipa obostarangni bidingo skie on∙aniko college ni IQAC dol aro 100 Bn BSF sipai dolrang bakrime programko ong∙atangaha. Ia skie on∙aniona sak 250 na batpile chatro chatrirang re∙bae programo bak ra∙aniko nikangaha jeon uamang saksa sakgipinoniko skie ra·grikaniko dakangaha. Iasan ong∙aigija, agantalatgiparang aro bakko ra∙giparangna an∙tangtangni ma∙sianirangko saksa sakgipinna u∙iatgrikna programo dingtangmancha cholkoba on∙angaha.
College ni gital computer laboratory koba program ong∙atani bakon nokdonggae on∙aniko dakangaha jeon BSF sipai A. K. Tiwari ni dilanichi bol gittam computer rangko on∙gilangaha. Ia programko ong∙atanichi u∙ie ra∙ani cholkosan on∙aigija, skie on∙enggiparang aro bakko ra∙gipa chatro chatrirang baksa bakrime ma∙sigrikaniko ra∙bana miksonge ong∙atangaha ine college ni Principal Dimseng K. Marak aganangaha. Unbaksana Marak dingtangmancha BSF dolrangni dakchakanina aro on∙gilanina mittelpilani kattarangko aganangaha. Ia programona Deputy Commandant, Assistant Commandant, Subedar Major aro gipin me∙chik officialrangba dongpae bakko ra∙e chu·sokatangaha.
