South Garo Hills Chokpot block ni ning∙o donggipa Rongchanggre songo Job Card nigita sal 100 na kamko ka∙mangenchimoba songni manderangna sal 86 ni hajirarangkosan chamataha ine parakataha. Songo donggipa manderangni janapanigitade kam ka·e matchotgiminko see dongipa biapo sal 100 ko segate dongenchimoba uamangni sal 14 ni man∙a nanggni hajirarangko man·sokujaengani gimin suk ong∙gijaniko koborna parakataha.
Iani bidingo songni manderang Block office ona re∙ange sing·sandianiko dakgenchimoba office-ni manderang obostani gimin dal·e ra·gija uamangko Narenda Modi chi re∙ange sandianiko dakchinasa aganchakangskaaha ine parakataha. Indake kragija aganchakaniko man∙e aro ong∙gimin obostani ja∙pangrangko sandinagita songni manderang aro dilgiparang SGH ni DC, Chokpot BDO aro Project Director-na chitti sedoe kamrangko nirokatchina mol∙molangaha.
Uamangni agananigitade Block o kam ka∙giparang tangkarangko Job Card ka∙giparangni account ona watataha ineba aganangaha. Indake ong∙genchimoba songni manderang account tangtangniko bank chi re∙ange sandianiko dakon uamangna tangka napgijaniko niknagita man∙aha ine u∙iatangaha.
