Tura songjinmani ning∙o donggipa skul ba skichakram biaprangoni 100 metre mangni ning∙o dokan dakgiparang ta·makku ba uandakgipa pekatgipa bosturangko palna gita man∙jawa aro bilsi 18 gapkugijagipa bi∙sarangna ta·makkuni bosturangko palna raken beng∙aniko Tura Municipal Board nigita u∙iataniko on∙angaha. Ia palna beng∙aniko West Garo Hills ni Deputy Commissioner ni ge∙etaniko man∙e ja∙ku deangaha ine TMB u∙iatangaha.
Juvenile Justice Act, 2015 ni section 77 ni niamo pangchake je mandean ia niamko pe∙e bilsi sokkugijapa bi∙sarangna pekatgipa bosturangko on∙a ba pala sim∙aniko dakengachim uamangko bilsi snina pattoko donataniko dakan baksa gong lakh 1 tangkarangko dai gamna nang∙gen ine u·iataha. Unbaksana section 78 ni niamo pangchake bilsi chu·ongkugijagipa bi∙sarangko pekatgipa bosturangko badingchiwalatna ba pala sim∙ani kamrangna jakkalgipa manderangkoba apsan dakgipa sastiko on∙anggen ine u∙iatangaha.
