Education department o bangbang ong·e dongenggipa kamrangna jagittam ba jadokni gisepo nigrike gapataniko dakna Meghalaya Education Recruitment Board (MERB) ko songe on·angaha. MERB ko songe sorkarini re·mikkangna miksonganiara mongsongbate higher aro technicalni gadang baksana secondary aro gipin gadangrangoba ge 187 bangbang ong·e dongenggipa kamrango gapatna nanga dongkuenga ine skotong Minister Conrad Sangma aganangaha.
Sangmani agananigitade ia kamrangna re·anggipa bilsi 3 ba 4 onin gapata dongkuja jekon sorkari iachango MERB ko ra·bae jagittam ba jadokni gisepo bon·kame rimnapaniko dakanggen ine parakangaha. Batanggimin changoba a·dok sorkari Meghalaya Medical Recruitment Board (MMRB) ko songe on·angaha ine ua agandapangaha.
MERB ko ra·baaniara bangbang ong·e dongenggipao gapatna nanggipa kamrang bang·ani gimin MPSC somoigita porikkarangko ong·atna man·jani a·sel ia ja·kuko de·angaha ine Sangma aganangaha. Batanggimin chango bilsi 5 na kamna rimnapanio dondikna nangao ga·akaha jeon MMRB ko songani ja·mano sak 500 doctorrangko medical department o rimnapna chol on·aha ine ua janapangaha.
Apsandaken skulo skigipani kamrangnaba dakna nanggnirangko matchota bakan rimnapaniko MERB o napate, board ge·sako chalaie kamna rakkianiko dakanggen ine Sangma aganangaha. Skotong Minister ni agananigitade, skulni skigiparangko a·bachengaonin division gadangoni kamna rimnapagita niamrangko dingtangatgija ja·rikangkuaigen ine ua parakangaha.
