A·dokni MP aro MLA rangni dosi dakani kosako badi ka·giminrangni report ko somoigita sokatchina Meghalaya High Court Sukrobar salo ge·etangaha. MP aro MLA rangni kosako mokordoma ka·giminrangko matchotatna 2023 bilsini November 9 tariko Supreme Court ni ge·etgimino pangchake kamrangko nirokatchina u·iatangaha.
Matchotkugijagipa mokordomarangko a·ja gimikni District and Session Judges rang Sl. (iii), (iv) aro (vi) o pangchake report rangko sokatnagita Chief Justice (Acting) HS Thangkhiew ge·etangaha. Court rang para 20 (iv) aro para (vi) o ga·akgipa mokordomarangko mongsonggipa ong∙e ra·e kamrangko ka·chinagita didiangaha. Para (vii) ni ning·o ga·akgipako nirok sandie Computer Section na nanggipa ja·kurangko de·angna cholko man·gen ineba u·iataha.
Supreme Court ni ge·etanigitade Principal District aro Sessions Judge rangko High Court nigita obostarangko nigrike daitorangko on·a nangnaba donga ineba aganangaha. Unbaksana Court rangna uamangni chu·gimik dakchaniko on·agitaba ge·etangjolaha. Court rangni mongsonggipa kam ka·na nanggnirangko Supreme Court ge·etangaha jean MP aro MLA rangni kosako (i) dosiko dakanina mokordoma ka·a man·giparangna signigipa sasti ba janggi tanga gimik patoko donani, (ii) patoko bilsi bonga ba una bate don·ani aro (iii) gipin sasti on·anirangko nigrike kamrangko ka·angna nangan baksa ong·ronggijagipa a·selna agre mokordomani kosako dontongna nangjawa ine u·iataha. Una agreba Principal District and Sessions Judge rang nambate kamrangko ka·nagita jako ra·e kamko ka·enggipa court rango chu·ongagita rika cho·aniko aro technology ko ja·riknagita dakchakangnagita nanggen.
Ia mamlarangni bidingo Special Bench nigita nangan somoio nipiltaie kamrangko ka∙na man∙gen ine Apex Court aganangaha. Court ni Special Bench na dakchakaniko on∙agita Advocate General ba Public Prosecutor ko rimnape kamrangko ka∙na man∙an baksana mokordoma ka∙giminrangko uamangni am∙sandianio pangchake matchotatna man∙gen ineba parakataha. Unbaksana mokordomarangko ta·rake matchotatnagita High Court uamangni chu∙gimik talataniko ba see rakkianiko website-o dingtangmancha donagita nanggen jean badi ka∙ani bilsi aro ka∙na nanggnigipa bangki kamrangni bidingo chu·sokatnagitaba Supreme Court ge∙etangaha.
