Chang 70 gipa All India Co-operative Week 2023 ko manianiko November 17 tarikoni a∙bachengatangaha. Ia manianiko Baghmara Baptist Church Hall o ong∙atangaha jeon Baghmarani Block Development Officer (BDO) Jericho N Sangma mongsonggipa sokgipa ong∙e bakko ra·angaha. Songadam nokadamrango kangal cholgrirangna dakchakanio aro songko nokko silroro namroroatanio Co-operative Societies ni gamchataniko ia tom·bimonganio Marak agan-talate on·angaha.
Songko nokko namdapatna aro songdongenggipa manderangni namgnina sorkarini kam ka∙anio bakrimpaaniko on∙chinaba Marak didiangaha. Songsalko namdapatna saksa sakgipino pangchakgrikesa chu∙sokgipa aro silrorogipa ong∙na man∙a ineba Marak ku·pattianiko on·angjolaha. Ia maniani bako Baghmara Block ni ning·o donggipa Siju Gangga aro Chokpot Block ni Silki Achak dolrangna a∙jao kam ka∙anio nambatgipa Co-operative Societies ong·anina boksisrangkoba on∙angaha.
