Tura MotorSport Club (TMSC) dolrangni snigipa changna ong·atgipa Bilgaro 4-wheel Challenge 2023 ni susagrikani da∙al salni bako ga∙subee matchotangaha. A∙brini ramarangko chakka rongbrini gariko salsusaanio chu∙gimik sak 27 manderang gisiko nangbee bakko ra·angaha.
Skanggipa salo Anogre songo tarigimin ramao susagrikanio bak ra∙gipa sak 27 salsusagiparangoni sak 7 susagiparang ge∙gipin gadangona seokako man·angjaha.
Da·al salni susaanio sak 20 gari salgiparangna a·bri ko salsusaaniko Jengjal Aguragre o ong·atangaha. Ia susagrikanio skanggipa changna LIDAR machine ko jakkale somoi aro ta∙rakanirangko name dake ma∙sinagita dakchakanichi chegiparangko kragipa aro chong∙mot bewalo seokna man∙angaha.
Bilgaro 4 wheel challenge 2023 o car salsusagipa doloni skanggipa biapko Shillong oni Ronan Bazeley cheangaha. Gnigipako Ryan Silkam M. Sangma aro gittamgipako Tingku Marak cheangskaaha. SUV category o salsusagiparangoni Daniel M. Sangma skanggipa biapko cheangaha, gnigipao Isaac Momin aro gittamgipa biapo Shillong-oni Meeth Tariang cheangskaaha. Susaanio chegiparangna skanggipana tangka gong lakh 1 ko, gnigipana hajal 75 aro gittamgipana hajal 50 ko on·angaha. Gari salsusaa gimiko nambatgipani bimingko Ronan Bazeley man·angskaaha.
Ia bon·kamgipa susaani salo Sanjay A. Sangma mongsonggipa sokgipa ong·e bakko ra·angaha. Unbaksana susaanio chegiparangna trophy aro tangka paisarangko TMSC President Grahambell A. Sangma ni jakchi pakwataniko dakangaha.
