Mijal salni bako a∙dokni skotong Minister Conrad K Sangma Meghalayako dal·roro silroroatna a∙dokni chamdamberangna dakchakna, jatni daka rikaniko bilakbatatna aro mikkangchi a∙dokko chu·gimik tang∙doatna kamko ka·nagita miksonganiko aganangaha. A∙dokni chamdamberangni changa sapanio uamangna dakchaknagita miksonganiko aganengon, jawilwat ni a∙bao, doke dame ringsalanio, bading chiwalanio aro tourism ni a·bao tang·doatanikoba Sangma janape aganangaha.
Chadamberang nikjumange mangmang dongaigija an∙tangtangko on·kange a∙dokni namgnina aro dal·roro silroroanina kamko ka·nagita nanga maina mikkangchi chamberangan a∙dokko chalainasigiparang ong·a ine agane ku·cholsan ong·e a∙dokni namroro silroroanina kamko ka·nagita Sangma didiangaha. A∙doko jawilwatni a·bako tang∙doatnagita, chamdamberang bakko ra∙e sokarini Meghalaya Grassroot Music Project nigita a∙dokni dakbewal rikbewalrangko a∙gimikna mesokaniko dakangchinaba didiangaha.
Unbaksana Lakadong Turmeric Mission ni chu·sokani gimin aganengon, sak 12,000 game ge∙e chagiparangni bimchipe kamko ka∙anichi a∙doknigita e∙ching ge·anio 50,000 tonrangko man∙aha ine Sangma janapangaha. Apsan daken me∙chik dolni ge 45,000 Self Help Group rangna dakchakaniko on∙agita man∙aha jekon sorkarinigita a∙dokko tang·doatna rake kam ka∙aniko mesoka ine Sangma janapangjolaha.
CM-Elevate Programme ko a·bachengate on·ani bidingo aganengon, tangka paisarangnigita 75% subsidy rangko on∙e sak 20,000 bading chiwalani a·bao dake cha·giparangna jekai music studio aro wellness centre-rangko a·bachengnagita dakchakani bidingo aganangan baksa sorkarini entrepreneur-rangko dal·atna chuatna miksonge a∙dokko tang∙doatnagita kam ka∙ani ong∙a ine Sangma aganangaha.
A∙dokni samtangtango donggipa buring bolgrimrang, matburingrang aro gam jinrangko ripingnagita jeon mosongbate koelarangko bikotani bon·angenganiara songsalna neng·nikanirangko on·enga. A·doko bang·a gamjinrang aro nitogipa biaprang donganichi ia biaprangko tang·doatna manderang sorkari baksa jak on·e bimchipe kam ka·chinaba didiangaha. South East Asia, Vietnam ni North East India baksa bakrime kam ka·nagita miksonganiko agane a∙doko sildoreng bilatna, rama jal·ang, ringani chi aro dingtang dingtang nanganirango ma∙mong sorkarinigita dakchakanikoba janape aganangaha. Jal Jeevan Mission nigita a∙dokni nokantiona ringani chirangko sale on∙anio 0.75% oni 61% ona tang∙doaniko niknagita man∙aha aro re∙baenggipa 2024 bilsini March jao 90% na bate chu·soknagita ka·dongsoenga ine Sangma parakangaha.
A∙dokni doke dame ring·salani a·bao tang·doate a∙gimiko gipatnagitaba Prime Minister baksa agangrikani bidingoba parakangaha. Meghalaya a∙dokni dingtanganiko niknagita man∙e mikkangchi a∙dokni dal·roro silroroaniko niknagita ka·dongsoanikoba Sangma parakangaha.
