Samanda block ni ning·o ong·gipa Rongongre aro Cherangre songo Vikshit Bharat Sankalp nigita a·songo ma·mong sorkarini adita scheme rangchi dakchakani bidingo EGH District Administration, a·dok sorkari, sorkarini ning·o donggipa dingtang dingtang departmentrang aro gram panchayat rang baksa bakrime awareness program ko ong·atangaha. PM Jan Dhan Yojna, PM Jeevan Jyoti Beema Yojna aro Atal Pension Yojna scheme rangna Reserve Bank of India aro Meghalaya Rural Bank nigita tangka paisani bidingo dakchakaniko officialrang agantalate on·angaha.
Ia programko ong·atani somoio, man·a kragipa manderang gital biming segatanirangkoba dakangjolaha. PHE department ni officialrangba JJM ni ning·o nokantiona rongtalgipa chiko aro chu·ongagita sokatna chu·sokani gimin aganangaha. Unbaksana a·jani Department of Agriculture & Farmer’s Welfare, Agricultural Technology Management (ATMA) dolrangba a·arangko simsake rakkina aro samrangko jakkalgija ge·a gamaniko dakani gamchataniko agantalate on·angskaaha.
PM Biswakarma scheme nigita dingtang dingtang course jekai sol·a repani, sika koani, nok rikani aro a·ste oniko bostu tarianirangko skie ra·na cholko on·anirangko skie ra·china District Commerce & Industries Centre ni officialrang didiangaha. EGH Krishi Vigyan Kendra (KVK) ni scientist rang bakko ra·anggipa manderangko samrangko jakkalgija a·arangko porikka ra·e, kragipa a·ao me∙surangko ge∙e bang·bate biterangko man·gnini bidingo u·ie ra∙na didiangaha. Unbaksana badia na∙tokni jat jelbatgen aro uamangna namgni ong·gen uko nigrike na·tok jilanirangkoba dakchina didiangaha.
Williamnagar LPG agency dolrang songni manderangna, Ujjwala scheme nigita gas rangko ra·na indin biming segatna dakchakangaha. Una agreba Nengmandal PHC aro Sampalgre Health Sub-Centre ni doctor rang, Nurse rang aro sanna bannanio dangdike on·giparang, sakantikon Malaria, blood pressure level, TB aro adita sabisirangko porikka ra·e nichinagita didiangaha. Ia program ni bako an·o gnanggipa ma·giparang, bi·sa desarang aro bilgrigipa ma·giparangko porikka ra·e nianirangkoba dakangaha.
Una agreba ma·mong sorkarini jako ra·enggipa Brahmaputra Valley Fertilizer Corporation Limited ni officialrang maikai drone ko jakkale bang·a gamgimin ge·giminrangna samrangko satnagita man·ani bidingoba dakmesokangaha. Ministry of Information & Broadcasting ni Mobile IEC Van dolrang ma·mong sorkarinigita cholgrirangna dakchakgipa scheme rangni bidingo mesokanirangko dakangskaaha. Bon·kame ia programo ma·mong sorkarinigita dingtang dingtang dakchakani aro scheme rangni bidingo talatgipa chongipa ki·taprangkoba manderangna sualangaha.
