Chang 70 gipa All India Co-operative Week ko November 14 oni 20 tarikona East Garo Hills a·jao antisana manianiko bon·kamgipa salo dakrongbewal niamrangko dake matchotangaha. Ia chango manianiko “Role of Cooperatives Making India a Five Trillion Dollar Economy and Sustainable Development Goals” ine katta bichongko done Williamnagar DC park o maniangaha.
Ia manianiko Meghalaya ni Co-operative Department, Meghalaya Co-operative Apex Bank (MCAB) Ltd., Meghalaya Livelihoods and Access to Market Project aro Meghalaya Basin Management Agency (MBMA) bakrime ong·atangaha. Programona mongsonggipa ong·e sokbagipa Marcuise N. Marak manderangna aganangengon skotong Minister ni niksamsoani bidingo agantalate on·an baksana Meghalaya ni chu·gimik tang·doani chong·motan 10 billion kajina man·anio dingtangataniko ra·bana krenganiko janape aganangaha. Marak a·jani manderangko sorkari baksa bakrimpaaniko on·e a·doko rika cho·ani kamrangko tang·doatna dakchakchina didiangaha.
Bakdil NGO baksa bakrime FOCUS aro FOCUS+ ko ra·bae Co-operative Society rangna sorkarini dakchakani bidingoba Marak agandapangaha. Salgimikni somoio Computerization of PACS ni bidingo workshopko ong·atan baksana bading chiwalani kamrangko MMCS talatangaha aro PACS na bading chiwalaniko tang·doatani giminba chanchirimangaha. Unbaksana CM-Elevate ko MCAB aro MBMA ni u·igipa ma·sibatgiparangni dongpaanio ong·atangaha.
Bon·kamgipa maniani somoio PACS ni gimin talatgipa chongipa ki·tapkoba Marcuise Marak ni jakchi oprakangaha aro PACS ni gita a·jao kam ka·enggiparangko mande ra·anikoba dakangaha. Co-operative week ko manianiona gipin sokbagiparangara All Garo Hills Multi-Purporse Co-operative Societies Ltd. ni Secretary Sunny Joseph Mavelil, MCBA ni Managing Director OEJ Nongbri aro gipin dal·dalgipa manderangba aganangpaaha.
