EGH Rongjeng block ni ning·o donggipa Gabil Rongmil songni playground ko 2021 bilsioni kamrangko ka·nagita a·bachengatgenchimoba da·ona kingkingba kamrangko matchotate on·kujaengani gimin suk ong·gijaniko songni manderang parakataha. Iani bidingo songni sordar aro manderang jako ra·e kamko ka·enggipa contractor ko ta·rake matchotate on·china gita mol·molanirangko dakanggenchimoba knachakjaengani gimin Rongmil Unit ni A·chik Progressive Approach (APA) dolrangna u·iate nirokatchina gita mol·molangaha.
U·iataniko man·e APA ni President aro Secretary playground ko tarienggipa biapona re·ange nianiko dakon tarigija galchipe donaniko nikna gita man·aha ine parakataha. Ua playgroundara Gabil Rongmil songni damsa skulni chatro chatrirangna aro songni nanganirangna jakkalna tarienggipa ong·a jeon skulni annual sports aro songni dingtang dingtang programrangna jakkalgipa ong·a ine songni sordar agandapangaha.
Ia obostani bidingo songni manderangni neng·nikani aro suk ong·gijaniko nike jako ra·e kam ka·enggipa contractor na mikrakataniko on·angaha. Unbaksana kamrangko ta·rake matchotatjagenchim ong∙ode contractor ni kosako raka ja·kurangko de·anggen ineba APA ni President parakataha.
