Raksamgre Civil Sub-Division ni ning·o donggipa Nengbapara songo bijolini krongrang maram cha·e be·gropna am·e dongenganina gital krongrangko ta·rake songe on·taichina A·chik Holistic Awakening Movement (AHAM) Bawagre Unit, Meghalaya Energy Corporation Limited (MeECL) departmentko mol·molataha.
Uamangni janapatani gitade je bijolini krongrangan maram cha·e be·gropna am·e dongenggiparangara Nengbapara Lower Primary Skulni sa·ra nangchapgipa ong·an baksana Nengbapara Anganwadi Centre-ni sepang ong·ani gimin skulni chonchongipa chatro chatri rangna kenchakani ong·enga ine AHAM Bawagre Sub Unit ni Vice President Briwat Sangma parakataha.
Nosto ong·e dongenggipa bijolini krongrang maibakai rang·gitik be·gropgenchimode skulni sa·rao bijolini siliting ga·akchakgen aro skulni chonchongipa bi·sarangna namen kenchakbeani ong·enga ine janapataha. Nosto ong·gipa bijolini krongrangko dal·a a·sel ong·gnioni naljoke rakkinagita gital krongrangko ta·rake songtaie on·china AHAM Bawagre unit, MeECL ko mol·molataha.
