Meghalaya a·dokni chatro chatrirangna ru·utbea somoirangna sokatkugijagipa man·a nanggni scholarship rangko antisa ba antigni ni gisepo sokatna ka·dongsoenga ine Education Minister Rakkam Sangma da·al salni bako kobor ra·timgiparangna parakataha. Post matric scholarship rangko Ministry of Tribal Affairs nigita 90:10 bak dake chamaniko dakronga jeon chamgimin tangkarangko man·agita a·dok sorkarinigita ka·na nanggipa kamrangko matchotate Utilisation Certificate (UC) rangko tarie watatmanaha aro ru·utgijan man·sotokgen ine Sangma aganangaha.
Jensalo chamatgimin tangkarangko ministry oni pakwatata bakan chatro chatrirangni account rangona wataniko dakanggen ine Sangma agandapangaha.
Ka·na nanggni kamrangko nambatatnagita Education department bank ni officialrang baksa gronggike, bank ni adita neng·nikanirang jekai chatro chatrirangni bank account aro IFSC rango neng·nikani baksana minggipin neng·nikanirangko u·iatchina didiangaha. Neng·nikaniko man·enggipa chatro chatrirangna nambate nirokaniko dake kamko ka·angna man·agita Education department na chu·gimik u·iataniko on·china bank rangko mol·molangaha ineba Sangma aganangaha.
