A∙dokni Fishery Department da∙al salni bako Tura, Police Parade Ground-o Garo Hills Regional Aqua Fest 2023 aro World Fisheries Day ko maniangaha. Ia manianio Assembly Speaker Thomas A. Sangma mongsonggipa sokgipa ong∙e bakko ra∙angaha. Unbaksana West Garo Hills a∙jani Additional Deputy Commissioner aro MCS Saljong R. Marak, Additional Superintendent of Police, MPS Priyanka Sangma re∙bae bak ra∙angpaaha.
World Fisheries Day ko maniangani somoio na∙tokrangko gisik nange badinganiko dakenggiparangna boksisrangko on∙angaha. Resubelpara ni Silsrang Sangma, Williamnagar ni Pangseng Sangma, West Garo Hills a∙jani Purnoraj Hajong, Katuligaon SWGH oni Babulal R. Marak aro Chengkali SGH ni Baskar S. Sangmana uamangni na∙tokko badinge cha∙anio gisiko nangbee kam ka∙enganina, mongsonggipa sokgipani jakchi boksisrangko on∙angaha.
Apsandaken Tikrikilla ni Mirjo Rabha na Refrigerated Truck ba bosturangko soatgija rakkina man·gipa gari bolsako on∙angaha. Ia manianiona bang∙a songo noko na∙tokrangko badingenggipa manderang sokbae an∙tangtangni jillenggipa na∙tokrangko manderangna mesokangaha.
