Changsnigipa Elite Men’s National Boxing Championship o West Garo Hills a∙jaoni Tura Balonggre gittimoni chadambe saksa Balnas A. Sangma bak ra∙e susaangnasienga ine koborna parakataha. Snigipa Elite Men’s National Boxing Championship-ko re∙baenggipa November 25 tarikoni December 2 tarikona NEHU, Shilliong-o ong∙atangna amenga. Balnas A. Sangma ia kal∙susagrikanio me∙asarangni kg 71 ni ning∙o senior gadango susaangnasienga.
Balnas Sangma-ni ia susagrikanio bakko ra∙na man∙enganiara West Garo Hills Boxing Association na mikkim rasongko ra∙baani ong∙enga ine Meghalaya Boxing Association aro WGH Boxing Association ni President Johnwell G. Momin koborna parakataha. Balnas A. Sangma-ni snigipa Elite Men’s National Boxing Championship na tarisamsoaniko dakengon, boxing association dolgimikni palo uni chu∙sokanina Momin nama skaniko on∙angaha.