Mijal salni bako Ri Bhoi a∙jani ning∙o donggipa All Khasi Hills A∙chik Federation (AKHAF) ni dilgiparang uamangni seokgimin Vice-President Ryngkhumoni Marak-ko kamoni ra∙galnagita Pillangkata pulis thanao badi ka∙doangaha. Marakko matnanganigita ua Assam Meghalaya a∙dokni sima ari jolo joa kal∙anirangko ong·atanio bak donggipa ong∙a aro an∙tangni bilko namgija kamrangna jakkalsretenga ine parakataha. Pillangkata Pulis thanani ning∙o ga∙akgipa biap Longkhuli aro Barapathar jolo niam gri tangka paisa kamaiani dingtang dingtang kamrangko ong∙atna bilko on∙engani gimin namnikjae AKHAF ni President Serimina D. Marak an∙tangan soi ka∙e badi ka∙aniko dakangaha.
Unbaksana dingtang dingtang joa kal∙anirangko jolo ong∙atenggipa dolrangoniko AKHAF ni Vice-President Meghalaya People’s Social Organization (MPSO) aro CoRP ni bimingo tangkarangko ra∙seke ra∙anirangko dakenga ine koborrangko man∙soaniko parake badi ka∙anio janapangaha. Indakgipa niam gri kamrangko ka∙anichi organization ni bimingko namgijaona ra∙baengani gimin kamoniko aro organization oniko chu∙gimik ra∙galaniko dakangna tik ka∙aha ine koborna parakataha.
