South West Garo Hills a·jao Pan India Rescue & Rehabilitation campaign ni bak gita bilsi chu∙ongkugijagipa bi∙sarangko kam ka∙ataniko champengna mikrakataniko on∙ani somoio Child Labour District Task Force, Zikzak Block ni ning∙o donggipa songrangoniko adita bi∙sarangko kam ka∙ataniko naljokatangaha. Ia somoio uamang songni manderangna chonchongipa bi·sarangko kam ka∙atjachina mikrakataniko on·e ia kamko bonchongdikatna bakrime ja·ku de·china agantalate on·angaha.
Pan India Rescue & Rehabilitation Campaign nigita a·song gimiko bilsi chu·ongkugijagipa bi·sarangko kam ka·ataniko champengna raken kam ka∙angenga. Zikzak blockni ning·o ia kam ka·anirangko nike campaign ni miksonganiko aro bi·sarangna mikkangchina namgipa songsalko tarina chanchianiko mesoka. Unbaksana ia kamrangan sorkarini ning∙o kam ka∙enggipa dolrang, niamko tarigiparang aro songsalo dangdike on∙giparangni bakrimanikoba u·ina man·a. National Commission for Protection of Child Rights (NCPCR) nigita Juvenile Justice Act 2015, Right of Children to Free and Compulsory Education (RTE) Act 2009 aro Prevention of Children from Sexual Offences Act 2012 o pangchake bi∙sarangko kam ka∙ataoniko naljokatna niamrangko tariangaha.
Ia program rangni ning∙o bi∙sarangko naljokatani, am∙sandiani aro a∙selni kakket ja∙pangrangko sandie kamrangko ka·a. Chonchongipa bi·sarangko karkanarango, dokanrango, hotel rango, ita tarichakramo aro rika cho∙anirango kam ka∙ataniko champengna awareness campaign ko ia jani 20 tarikoni December 10 tarikona NCPCR ni gita a∙song gimiko ong·atangna tik ka·angaha.
