East Garo Hills, Williamnagar ni ning·o ga∙akgipa Rongribo Gongmagre songo CLLMP MBMA nigita gitalgipa project ko a∙bachengatanina songni manderang jegale Deputy Commissioner aro CLLMP MBMA-ni officer in-charge na mijal salni bako chittiko sedoangaha. Rongribo Gongmagre songni manderangni talatani gitade, CLLMP project ko ra∙baaniara chengoni ma∙ambini rakkigipa aro ripingenggipa buring bolgrimko tange rakkina gita niamrangko tarie ripingbaenggipa songni kanggimin ong∙a.
Ia project ni bidingo songni nokni manderangna maming u∙iataniko aro masiataniko on·gija kamrangko a·bachengatenga ine songni manderang janapangaha. Ia a∙arang songni ong·genchimoba ia project ni kamrangko a∙kingni Nokma aro uni jakkalenggipa manderangsan CLLMP office-ona re∙ange tangka paisarangko bikotenba kamrangko ka∙angenga ineba janapatjolaha. Uni gimin ia kamko ka·nagita songni nokni don∙gimin niamo pangchake Nokma ong∙genchimoba saksan dakna niam dongja ine raken jegalaniko dakangaha.
Iani bidingo changnichang office-ona re∙ange u·iataniko dakgenchimoba, office ni manderang knachakjaengani gimin songni nokni manderang A∙chik Progressive Approach (APA) dolni dakchakaniko mol·mole uamangni dakchakan baksa raken jegale ia projectni bidingo nirokatchina gita chitti ko see u·iataniko dakangaha.