Mijal salni bako ASHA rangni man∙gniko gong 2000 oni 5000 ona bariatna dabienggipako on·gija, uamangni neng∙nikaniko naljokatnagita gitalgipa scheme Community based Health Incentive (CHI) ko ra·gatna tik ka·angskaaha. Ia u∙iataniko Meghalaya Accredited Social Health Activist Worker Union (MASHAWU) baksa golpogrikmiting somoio Health Minister, Dr Ampareen Lyngdoh parakataha.
Ia scheme-ko a·dokni skotong Minister baksa golporimani ja∙mano ra∙baaha jeon ASHA rangni an∙o donggipa ma∙giparangko sanchakram biapona re·dilanio korosna dakchakaniko on∙anggen ine Lyngdoh aganangaha. ASHA rangni nambee kamrangko ka·anichi a·doko an∙o donggipa ma∙gipa aro atchidaldal bi·sarangni sianirang komibeaha aro CHI scheme ko ra·gatanichi ASHA rangna bang∙a namgnirangko on∙gen ineba Lyngdoh aganangaha.
A·doko ASHA rangni neng∙nikaniko naljokatnagita pilak a∙jarangon committee rangko songe on∙anggen aro uamang pilak nanganirangko niroke kam ka∙anggen ine Lyngdoh agandapangaha.