Mijal salni bako West Garo Hills Singimari jolni mande saksako Tura Nakam Bajaro bi∙sa rim∙srukgipa ine potchipe manderang chagrope rim∙aha. A∙sel ong∙gipa biapona pulis dolrang re∙ange ua mandeko sepangbatgipao pulis thanaona rim∙e ra∙angskaaha.
Koborrangko parakatanigitade, ia mandeni bi∙sa saksana cha∙ani on∙aniko nike samtangtango donggipa manderang uko bi∙sa rim∙srukgipa ong∙nike potchipa gnang jinma chagrope rim∙enba pulisrangni re∙bana skang uko buduchi kae donaha ine u·iataha.
Pulis dolrangni uko rim∙ange sing∙sandianiko dakon ua bi∙sana cha∙ani on∙ako ku∙rachakaha aro sing∙e am∙sandianiko dakon uko salantio bajaro hajira kam ka∙e cha∙gipa ine ma∙sina gita man∙aha. Uni kosako maming dosiko man∙jae aro badi ka∙anirang dongjani gimin uko pulisrang watatpilaha ine parakataha.
