BCCI ni Jaipur o me·asarangna ong·tenggipa Vijay Hazare Trophy 2023-24 o Meghalaya dol skanggipa kal·aniko Vidarbha baksa susae 32 runs chi sirikaha. Meghalaya gochengna ra·chake, Vidarbha na 50 over o 243 run rangkosan tarina on·aha. Nisanona sokdona rikenggipa Meghalaya dol 211 runrangkosan man·e 48.1 overo chu·gimik wicketko ga·akate 32 run chi sirikaha.
A·bachengao Meghalaya dolna Raj Biswa 24 aro Nakul Verma 34 runrangko man·e on·angaha. Kishan Lyngdoh 75 roboloniko 57 runs ko man·aha aro Swarajeet Das 46 niko 45 runko dolna tarie on·angskaaha. Vidarbha ni tarigipa nisanko rikna jotton ka·engon Meghalaya dolna uamang sakgni over 14 o 78 runs rangko apsan tarie name kal·e dolko ra·doangaha.
Meghalaya ni robol gogiparangoni Dippu Ch. Sangma kal·ani bako over 10 o 43 runrangko on·e sak 4 wicketrangko ra·aha. Ian Marakni pilak kal·arangni gisepo nambate dakgipa ong·enga.
Vidarbha dolrang Ranji Trophy ko changgni cheahaoba aro adita IPL o kal·giparang donggenchimoba rikdona man·gipa nisankosan tarina man·aiaha. Meghalaya dol uamangni skanggipa kal·anio sina nanggenchimoba namprete raken dakmesokangaha. Uamangni gnigipa kal·aniko Sonibar salo Chhattisgarh baksa kal·angtaigen.
