Dingtangdingtang a·jarango rikenggipa dam 40 Eklavya Model Residential Schools (EMRS) ko nipiltaianiko dakangaha ine Education Minister Rakkam Sangma parakataha. Eklavya skulko rikanio ja∙manchakani mongsonggipa a∙selara skulrangko rikchakatnagita biaprangko man∙ingijani gimin ong∙a ine ua aganangaha.
Skulko a∙bachengatna gita adita somoirangko nangangkugen maina mitamrangko rika cho·ani matchotnasigenchimoba badiaba a·jarangode skulko rikna biaprangko da·ona kingkingan sandianiko dakuenga aro mitam biaprango rika cho·aniko a·bachengatasan ong·kuaienga ine Rakkam Sangma agangaha. Una agreba badiaba biaprangode skulko rikna biap man∙ja baksana biaprangko dingtangatna nanganirang dongkuenga ineba ua agandapangaha.
Rongara-o bilsi bongana kanggimin a∙ako sorkarini manderangni ku∙rachakgrikaniko dingtangatna nangao ga∙akenga maina India sorkarini dongimin niamo pangchake hactre 15 a∙arangko skul rikchakna indin on∙a nangenga.
Indake ong∙genchimoba a∙a nokgiparang a∙ako indin on∙a kusi ong∙gijani bidingo neng∙nikaniko man∙enga aro dingtangatna nangao ga∙akenga. Ia a·selrangni bidingo Deputy Commissioner ko sorkarini palo nanga kamrangko ka∙angchina aro neng∙nikanirangko nigrike kam ka∙china golpoangaha ine Rakkam Sangma aganangaha.
