Da·al salni bako Meghalaya Directorate of Dairy Development A.H, Veterinary Department Office of Assistant Director (Dairy) aro Senior Dairy Officer Tura, National Milk Day 2023 ko gisik ra·e West Garo Hills a·jani Ganol, Central Dairy Complex o maniangaha. National Milk Day ko tom·bimonge manianiona West Garo Hills, ICDP ni Assistant Director Dr. Violine A. Sangma mongsonggipa sokgipa ong·e re·baaha, unbaksana Tura Milk Union ni Chairman Charbilline A. Sangma aro A.H and Veterinary Officer Dr. Lensley R. Marak sokbae bakko ra·angaha.
Ia salko maniangani gisepo battanggimin salrango skul bisarangna, songni nokni manderangna adita susagrikanirangko Tura Senior Dairy Officerni ong·atanggipao chegiparangna boksisrangkoba on·angaha. Maniani bakgita adita dolrangni git ring·anirangkoba nikangaha. Unbaksana dingtang dingtang bosturangko pala sim·aniko dakna dokanrangkoba kulie on·angaha.
India a·songo mijal salo, chongmotan November jani 26 tariko Varghese Kurien ni atchiani salko gisik ra·nagita National Milk Day ko bilsi antian manirongenga. Kurien-ko Amul dairy firm ko a·bachengdilgipa ine mingsingbea aro India a·songo dudko sokatna miksonge kam ka·gipa ong·a jekon White Revolution ni padot ineba bimingko donaha.
