Dibrugarh, Assam-o 8 gipa Kurukshetra Open Fide Rating Chess Tournament ong·atgipao Meghalaya a·dokni sakgittam chadamberang chu·sokgipa ong·baaha. Ia tournament ko re·anggipa November 23 oni ong·ate mijal salni bako matchotataha.
Ia kal·susaanio Silkam A. Sangma round 9 kal·anio point 7 ko man·e chegipa ong·anichi bon·kame 3 gipa gadango chu∙sokgipa ong∙baaha. Unbaksana Rai Ganesh point 6 ko man·e 27 gipa gadangko man·baaha aro Mandal Ardhendu point 5.5 ko man·e 35 gipa gadangko man·baskaaha.
Chess kal·susaani a·bao Meghalaya ni chadamberangni chu·sokbaenganina International Arbiter of Meghalaya aro Chess referee Biju Singh uni namgipa skanikoba on·angaha.
