Meghalaya a·dokona torangko sokatna North-East Petroleum Mazdoor Union (NEPMU) ni dontongatna ja·ku de·angani ja·mano Meghalaya sorkari Union baksa November 29 tariko Nongpoh o tom·e golporimna tik ka·angaha.
Food & Civil Supplies aro Consumer Affairs ni Minister Comingone Ymbon ni agananigitade, a·bachengo ia dolrang baksa tom·bimongna Shillong ko tik ka·aniko uamang jechake Nongpoh o grongrikna ra·chakangskaaha.
A·dokni manderangko ia somoimitingo kenjagokgija dongchina mikrakataniko on·ate a·doko sal gni ba salgittamna chimonggimin torang dongkuenga ine parakangaha. Ia a·selrangni gisepo to ni damrang tang·doaniko chagrongnaba donga ineba ua janapangaha.
