BSF dolrang Bangladesh a∙songchina badingsrukna ra∙anggipa bosturangko rim∙a

Mijal salni bako Border Security Force (BSF) sipai dolrang Bangladesh a∙songona niamgri bosturangko bading chiwalna ra∙angenggiparangko rim∙aha. Rim∙a man∙gipa bosturangni chu∙gimik damara tangka gong Lakh 11 mangnigita ong∙a ine koborna parakataha.

BSF dolrang adita ka∙dongna man∙gipa koborrangko man∙soe, Indo-Bangla sima ari jolo niamgri badinganggiparangko nirokna tarisamsoani dake uamang Matma, Phensedyl, chini, chola ba∙rarang aro gipin bosturangko rim∙na man∙aha. Ia rim∙a man∙gipa bosturangko niamo pangchake badi ka∙china Customs officer rangna pakwate on∙angaha ine parakataha.