North Garo Hills, Kharkutta Pulis thana ni Officer in-charge o, songni Village Employment Council (VEC) President Jenibala Sangma, Secretary Riksan Sangma aro uni nokdangni manderangni kosako MGNREGS ni tangka paisarangko jakkalsretanina Nameram songni job card o biming donggiparang Nov 24 tariko badi ka·angaha ine koborna parakataha.
Uamangni badi ka·ani a·selara MGNREGS project ni scheme gita Nameram songo CC pavers block ramako tarina chamatgipa tangka paisarangko songni manderangna u·iatgija bikote jakkalani gimin ong·a ine parakataha. Ua project nigita job card o kam ka·giparangna chamatgipa hajira gong lakh 5 na batpilgipa tangka paisarangko songni Secretary jakkalsretaha ine badi ka·anio janapangaha. 2022-23 bilsina job card o kam ka·giparangna chamatgipa tangka paisarangni bidingo am·sandianiko dakon, semi-skilled labour rangna tangkarangko chamata dongja ine VEC Secretary kakketgijagipa lekka pancharangko mesokaha ine janapataha. Indake ong·genchimoba RTI ka·e am·sandianiko dakani ja·mano tangkarangko bikotani chong∙motgipa lekkako on·anio gong 5,36,916 ko chamata donga ine u·inagita man·skaaha.
Nambate am·sandianiko dakani ja·mano chamatgimin tangkarangko bikote President, Secretary aro uni nokdangni manderangni account rangona chipe donskaaha ine ma·sinagita man·aha. Ua tangka paisarangko an·tangni namgnina jekai gari gorarangko aro nokrangko rikaniko dakenga ine songni manderang Secretary ni kosako agananirangkoba dakangaha.
Unbaksana job card o biming donggiparangni jegalgenchimoba Secretary ni pagipa ramako tarianio bangki kamrangko matchotatnagita a·palni kam ka·giparangko rimnape ka·ataha ine janapataha. Una agreba job card o kam ka·giparangna u·iatgija aro uamangni donggijanioba attendance lekkarango tol·e soi ka·anirangkoba dakangaha ine parakataha.
Ia badi ka·anio 2022-23 na tol·e tarigipa lekka, RTI ka·anio aganchakani, jachipchang aro dingtang dingtang sakkirangni lekkarangko on·chapate dosi dakgipani kosako kraa sastiko on·china pulisrangko didiangaha. Indakgipa obosta ong·ani bidingo nambate am·sandianiko dakangkuchina aro jak donggiparangko kakket bichalona ra·bachinagita job card o kam ka∙gipa songni manderang didiangaha.
