Mijal salni bako skotong Minister Conrad Sangma Pradhan Mantri Awas Yojana (PMAY) ni bidingo nipiltaianiko dakna gita adita dilgiparang baksa chanchirimaniko dakangaha. Ia chanchirimanio bilsi 2023-2024 ni gisepo 1.40 lakh nokdangrangna PMAY nokko rike on∙anio chu∙sokgipa ong∙na mangsongangenga ine Sangma janapangaha.
Batanggimin bilsi 4 ni gisepo a∙doko 40,000-50,000 mang PMAY nokrangkosan rike on∙a gita miksonge kamrangko ka∙angaha, indiba 2023-24 bilsi 1 ni giseponiko ni∙atgenchimode PMAY ni nokrangko rike on∙anio 1.40 Lakh mangni gita nokdangrangna matchotatna kadongsoenga aro ian ma∙mong sorkari baksa nangrime chu∙sokna man∙kugijagipa nokdangrangko nipile matchotatna rakbee kamrangko ka∙engani gimin ong∙enga ine Sangma parakataha.
Ia kamko ka∙enganio ma∙mong sorkari namen dakchakniko on∙enga aro pilak nanggni kamrangni gimin golporimaniko a∙dok sorkari baksa dakenga aro gni gipa bakni tangkarangkoba chamataha aro tangka gong 800 crore mangni gita PMAY nokrangko rikna chamatmanaha ine Sangma parakangaha.
A∙dok sorkari PMAY nokrangko rikanio nirokna gita Mission Directorko songaha aro a∙ja geprako ADC rangko jako ra∙e nirokaniko dake, a∙jani Deputy Commissioner baksa antiprako chanchirimaniko dakange, japrako sorkarini gita tom∙aniko dakangskagen. Unbaksana DC aro BDO rangna antiprako sal 2 somoi ra∙e pilak Block ni songrangona re∙e nirokaniko dakchina gitaba ge∙ataniko dakangaha ine Sangma aganangaha.
