State Cancer Society of Meghalaya, Ampati Civil Hospital aro SWGH ni NP-NCD baksa bakrime cancer awareness program ko ong·atangan baksana cancer sabisiko tangka gri porikka ra·e nianiko Ampati Civil Hospital o ong·atangaha.
Ia camp ko ong·atanio sak 71 manderang re·bae tangka nanggija porikka ra·e on·ani namgniko man·angaha. Cancer specialist aro State Cancer Society of Meghalaya ni member Secretary Dr. Anisha Mawlong Shillong ni dolrangko rime sokbae ia camp o sanna bannanio nanganirangko dangdike on·angaha. Nambate porikka ra·aniko dakna man·agita nambatgipa kolrangkoba ia camp o jakkalangaha.
Meghalaya Cancer Society ia awareness program aro tangka nanggija porikka ra·e nianiko a·dok gimiko ong·atenga jeon a·jani hospital rangnigita cancer sabisioni naljoke dongna aro sabisi man·aniko seng·gnang u·ie sanna man·agita ja·kurangko de·angenga. Apsan dakgipa camp rangko Garo Hills ni Baghmara aro Williamnagar a·jarango matchotaha jeon Tura, Resu aro chonchongipa CHC, PHC aro songadamrango ong·atangkuna miksongenga ine parakangaha.
Unbaksana cancer sabisiko a·bachengbamitingo ma·sigenchimode sanna man·a amaniko aganangan baksa sorkarini sanchakram biaprango adita tangka nanggija sanna man·anikoba janape manderangna u·iatangaha. Porikka ra·e cancer sabisiko man·ani bidingo manderangni kenanirangko jegale man·a dipet porikka ra·jringe sabisini a·bachengbaaniko u·ie ta·rake sanna nangani bidingoba Dr. Anisha Mawlong aganangaha.
Una agreba skanggipa changna indakgipa namgipa ja·kurangko de·e manderangni an·seng baljokanina dangdike on·a program ko ong·atanina, Ampati Civil Hospital ni Medical Superintendent Dr. Denisha Momin kusi ong·aniko parakan baksa mikkangchi dangdike on·angkuchina nanganiko aganangaha.
