Tura Govt. Boys Higher Sec. School, Chandmari ni kal·chakram biapo, Tura Champions Trophy 2023 na da·al salni bako robol kal∙susanio Chipakkore FC aro Babelapara Sports Youth Club ni gisepgriko bil∙tinggrike susaanirangko dakangaha.
Ia kal∙susanio Chipakkore FC goal 2 ko chipna man·e chegipa ong·angaha jeon Babelapara Sports Youth Club goal 1 kosan chipna man·e amatako man·aha.
Chipakkore FC ni Bijay R. Marak goal 1 ko chipaha aro Brojen Muchahary gnigipa goalko chipskaaha. Una agreba apsan dolonin Samuel Shadap da·alni susaanio man of the match bimingko man·angskaaha.
