Re·anggipa November 28 tariko National Institute of Open Schooling (NIOS) o D.El.Ed ko poraie matchotgiparang mikkangchi skigipani kamrangna galna man·jawa ine Supreme Court (SC) rai on·angaha.
NIOS D.El.Ed ko 2017 bilsio, kam ka·enggipa skigiparangnasan poraidapna cholko ra·bana miksonge a·bachengatangaha. Ia skigiparangna cholko ra·bae on·ani gisepon skigipani kamko ka·nagita poraienggipa bang·a chatro chatrirangba NIOS o tangka paisanigita gamna nangani olgrokbatani gimin poraianiko dakna a·bachengbaskaaha.
Indake ong·engon NIOS o D.El.Ed ko poraie matchotgipa chatro chatrirang SC ni on·gimin rai ko namnikjae sorkarini kosako High Court o jegalaniko dakangaha. High Court uamangni jegalaniko knachake re·anggipa 2022 bilsini February 10 tariko SC ni rai on·giminko sorkariko ra·galpilna ge·etangenchimoba, SC knachakgija on·gimin rai ko ra·galjachina aro ge·etgiminko ja·rikchinagita Mongolbar salo u·iatangaha.
