Da·al salni bako Wild Tour Garo Hills aro Tura Adventure Club bakrime West Garo Hills ni ISBT o Tura Kite Festival ba lekka do·reng watsusagrikaniko ong·atangaha. Ia lekka do·reng watsusaaniko Tura Motor Sports Club (TMSC), Tura Runners Club aro West Garo Hills District Admininstration mongsonggipa bakrimgipa ong·e chu·sokatna man·angaha. Susaanio sak 29 gisiko nanggiparang re·bae bakko ra·e saksa sakgipin baksa watsusagrikangaha.
Da·alo lekka do·reng watsusaaniko pekatgipa bosturangko cha·a ringaniko champengna mikrakataniko on·angjolagita ong·atangaha. Ia susaaniona Mahendraganj ni MLA Sanjay A. Sangma aro Babelapara-ni MDC Rakesh Sangma mongsonggipa ong·e sokbaaha.
Da·alo Lekka do∙reng watsusaaniko solo fight, squad fight, most creative kite ni gadangrangko bak dakate susaataniko dakataha. Susaanio bak ra·giparangko bilsi ma·ekate dal·gipa aro chongipana dingtang boksisrangko on·angaha. Unbaksana silbate lekka do·reng tarigipana dingtang mancha boksisko on·angaha.
Bilsi dal·giparangni bako susagipaoni skanggipa gadangko Dikki Sangma man·angaha.
Bilsi chongipa chadamberangni gisepo Agano Ch. Sangma cheangskaaha. Best dog fight ba saksa sakgipin baksa ratgrike susaatanio Baithy Sangma cheaha, squad fight ko Doreng squad dolrang cheangaha, solo kal∙susaanio Tenzy Sangma chegipa ong∙angaha aro silbate lekka do·reng tarigipani bimingko Jernykova Sangma man·angskaaha.
Ia somoini bako Meghalaya Grassroot Music Project ni gita Ricky Sangma aro AMVA ni dakmesokanikoba nikangaha.
