Re·anggipa salrango National Institute of Open Schooling (NIOS) ni ning·o poraigiparangko skigipani kamko ka·na ra·chakjawa ine Supreme Court ni parakatgipako a·dok sorkari nipilangenga ine Education Minister Rakkam Sangma aganangaha. Sangmani agananigita NIOS ni ning·o, 2014-2015 bilsirango Meghalaya a·dokni hajal 20 na batpile manderang D.El.Ed. ko daktokaha ine parakangaha. Pilak ja·kurangko de·na skang SC ni raiko poraichenge, D.El.Ed. ko dake skulrango skigipani kamko ka·enggiparangni namgnina sorkari nirokatgen ine Sangma agandapangaha.
NIOS ni ning·o D.El.Ed. dake matchotgiparangko, 2648 skigipani kamrangna nakatgipao rimnapna ra·chakaniko jegale Uttarakhand a·dok sorkarini SC ona ra·ange sing·doani ja·mano SC ia raiko November 28 tariko rai on·angskaaha. Chubatgipa gadangni court ni rai on·anigita, NIOS o ja 18 na D.El.Ed. dakgipaming bilsi 2 poraie matchotgipaming dingtanggrikani donga ine parakataha. Indake ong·genchimoba ia parakatgimin raini kosako sing·dona man·gen ine SC aganangskaaha.
