SWGH a·jao bolrangko niam gri badingsrukanio jak donganina aro GHADC ni Transit Permit (TP) rangko on·e Assam ona salangna on·anina, Mahendraganj Forest Official rangni kosako social activist rang aro GSMC dolrang December 1 tariko Ampati pulis thanao mokordoma ka·angaha. A·dokni ning·o bosturangko salruranasan TP ko on·agita man·aia aro gipin a·dokona salna TP ko on·a man·gijani gisepon forest officialrang altuae gipin a·dokona TP rangko on·aha ine parakataha.
Indake skatang TP rangko on·anichi Assam a·dokona Mirzumla, Aidoba, Jhanjoni pekwatgipa ramaranggita bolrangko badingsrukanirang batroroenganiko niknagita man·enga ine u·iatangaha. Unbaksana indakgipa apsan mamlani bidingo November 22, 2023 tariko Mahendraganj Division ni Forest Range Officer na lekka see u·iataniko dakangmanahaoba maming ja·ku de·e kam ka·anirangko dakjaha ine janapangaha. Una agreba November 30, 2023 tarik salni 2:30 bajimango, Assam-ona bolrangko gate salangenggipa bolbri garirangko Zikzak pulis thana sepango nike Mahendraganj Forest Range Officer na koborko on∙ate ua garirangko range office ona ra·angaha.
Rim∙a man∙gipa garirang Namseng Marak ni salenggipa bolero pick-up ML-14 8985, Vishal Hajong ni salenggipa ML-14 9692, Thiman Marak ni ML-08F 9472 aro Secondson Marak ni ML-08A 7129 ong·a. Bolrangko gape gatgimin garirangko office ona ra·anggenchimoba salgipinon garirangko bolrang baksaan watpilaniko dakangaha ine badi ka·anio janapangaha. Indakgipa obostarang ong·engani bidingo niamrango pangchake badingsrukgiparang aro forest officer, GHADC ni kosako ja·ku de·e kragipa sastirangko on·chinagita mol·molangaha.
