North Garo Hills a∙jani Raja Apal Sub-centre ni ning∙o, an∙o donggipa ma∙giparangni bi∙sa an∙pakaniko name chu∙sokatnagita Health department dingtangmancha chu∙ongagita sanna bannaniko on∙a rakbee kamrangko ka∙angenga.
An∙o donggipa ma∙gipako an∙pakani somoio sanchakram biapona rimbaanian bi∙sani ma∙gipa aro pagipana nambatgipa dakchakaniko on·agita ja·ku de·ani ong∙a. Sanram biapo dingtangmancha an∙o donggipa ma∙gipana an∙pakna skang dingtang dingtang nanggipa sanna bannanirangko on∙a changgipa aro sapgipa dangdike on·gipa dolrangchi nirokaniko dakenga.
Bi∙sa an∙pakanina on∙gimin salrang sokgenchimode ma·gipako sanchakram biapona rimbanagita nanga. Sanchakram biapo ma∙gipako dingtangmancha an∙pakani somoiona nirokaniko dakangan baksa bi∙sa an∙pakani ja∙manoba ma∙gipa aro degipana simsakanirangko dakangkugen. Ma∙gipani an∙seng baljokaniko porikka ra∙e nianirangko dake, bi∙sana sok kannanirangko nirokan baksana ma∙gipa aro degipani an∙seng baljokaniko porikka ra∙e nianirangkoba dakangenga.
An∙pakani somoio ma∙gipako sanchakram biapona rimbaanichi ma∙gipa aro bi∙sani an∙seng baljokaniko naljokatasan ong∙aigija, bang∙a a∙sel ong∙gnirangoni ma∙gipa aro degipako naljoke rakkinagita man∙ani ong·anggen.
