Garo Hills ni dingtang dingtang bakrango International Day of Person with Disabilities ko “United in action to rescue and achieve the sustainable development goals (SDGs) for, with and by persons with disabilities” katta bichongko done gisik ra·e mijal salni bako maniangaha. Ia programko North Garo Hills, East Garo Hills aro South West Garo Hills a∙jarango gisik ra∙e manianiko dakange, a∙jani dingtang dingtang Official-rang bakko ra∙e gisikni aro be·ennigita bilgrigipa manderangna Sustainable Development Goals (SDGs) ni bidingo agantalate on∙angaha.
NGH a∙jao ADC Kapil Koch mongsonggipa ong∙e sokbaaha aro unbaksana SD M&HO Dr. Niranjan Marak-ba sokbae bakko ra∙angpaaha. Tom∙aniona gisik aro be∙ennigita bilgrigiparang sak 150 aro uamangko dilbagiparang sak 150 chong·motan chu∙gimik sak 300 mang sokbae bakko ra∙angaha. Unbaksana uamangko Aadhaar aro MHIS rango biming segatanikoba dakangaha. Apsandaken District Election Office nigita re∙bagiparangna Election Roll o bimingrangko segatani bidingoba agantalatanirangko dakangaha.
EGH a∙jao Samanda C&RD block ni Block Development Officer Tochri R. Sangma mongsonggipa sokgipa ong·e bako ra·angaha. Ia manianio be·ennigita bilakani aro gisiknigita an·seng baljoke dongani bidingo Sangma aganangaha. Unbaksana ia manianio District Legal Services Authority ni Baseng N. Marak, District Medical and Health Officer Dr. Saljun D. Sangma aro Drimbos N. Sangma dongpae agan kupattianirangko on·angaha.
SWGH a∙jao ADC Dr. Rezina Marak mongsonggipa sokgipa ong·e Sustainable Development Goals (SDGs) ni bidingo bakrime kam ka·ani gamchataniko agantalate on·angan baksa uamangni dakna nangnigipa kamrangni bidingo sorkarini on·gipa scheme rango Aadhaar card ko nangchomotani aro uamangna dingtang dingtang department rango a·kange dongipa kamrangni bidingoba talate on·angaha. Una agreba District Immunization Officer Dr. Noreen Sangma aro Advocate A Hussian, Rights of Persons with Disabilities Act, 2016 aro be·en bimangna dakna nangchotmotgipa kamrangni bidingo talate on·angaha.
Ia programko bilsi antian District Social Welfare nigita December ni 3 tariko gisik ra∙e manianiko dakronggenchimoba, ia bilsio 3 tarik robibar ong∙ani gimin December ni 4 tariko manina nangaona ga∙akskaaha. Ia program gisikni aro be·ennigita bilgrigiparangna indin porikka ra·e nianiko dake, samrangko sualangan baksana dingtang dingtang kal·susaanirangko ong·ate boksisrangkoba on∙angaha.
